26—30 июль кунлари Олма-Ота шаҳрида жисмоний имконияти чекланган спортчилар ўртасида пауэрлифтинг бўйича Осиё чемпионати ўтказилди. Ўзбекистон Миллий Паралимпия ассоциацияси берган хабарга кўра, чемпионатда ўзбекистонлик 9 спортчи иштирок этган.
Ушбу нуфузли мусобақада ўзбекистонлик паралимпиячилар 5 та медалга сазовор бўлди. Роза Қўзиева 45 килограммгача бўлган вазн тоифасида 75 кг тошни ўзига бўйсундириб, бронза медалини олди ва 2016 йили Рио-де-Жанейрода ўтказиладиган Паралимпия ўйинларида иштирок этиш учун лицензияга эга бўлди.
Ўсмирлар ўртасида Фарҳод Умрзоқов (72 кг) ва Ҳамид Ражабов (54 кг) олтин медалларни қўлга киритиб, Осиё рекордини ўрнатди.
50 кг вазн тоифасида Қудратой Тошпўлатова бронза, 80 кг вазн тоифасида Достон Абдусатторов кумуш медалини қўлга киритди.
Осиё чемпионатида 32 давлатдан ташриф буюрган 280 дан ортиқ спортчи иштирок этди.
Изоҳ (0)