Украинанинг собиқ бош вазири Николай Азаров Москвадаги «Украина» меҳмонхонасида бўлиб ўтган матбуот анжуманида Украинани қутқариш қўмитаси тузилганини эълон қилди, деб хабар бермоқда «Корреспондент.net».
Қўмитага Азаровнинг ўзи бошчилик қилади. Уни тузиш учун Украинадаги ҳозирги вазият асос бўлган. «Мен Украина ҳукумати раҳбарлигидан истеъфо берганимда турли сиёсий кучларни ўзида бирлаштирган миллий бирлик ҳукумати тузилади ва энг асосий иш — мамлакатимизда барқарорлик, тинчлик ва осойишталикни тиклайди, деб ўйлагандим», — деди Азаров.
«Таъкидлаш лозимки, истеъфоимнинг шарти мамлакатни барқарорлаштириш, тинчлик ва барқарорликни тиклашга халал берган барча ноқонуний жангариларни, ноқонуний қуролланган бўлинмаларни қуролсизлантириш эди. Бу даврда менинг ва мамлакат раҳбариятининг қарорларида жиддий хатоларга йўл қўйилганини вақт кўрсатди. Шубҳасиз, бунинг учун жавобгарлик ҳукуматнинг собиқ раҳбари сифатида менга ва мамлакатнинг собиқ сиёсий раҳбариятига тушади.
Украинада ҳокимиятни давлат тўнтариши йўли билан эгаллаган кучлар кўп қон тўкилган урушни бошлади, ўз халқини йўқ қилиш, иқтисодиётни вайрон қилиш сиёсатини ўтказишни бошлади, қисқа вақт ичида мамлакатни хаос ҳолатига олиб келди. Биз буни тасаввур ҳам қила олмасдик. Шунинг учун ҳам ўзининг амалий тажрибаси, билимлари билан мамлакатни инқироздан олиб чиқиб, урушни тўхтатиб, мамлакат тараққиётини таъминлай оладиган кишиларни қўмита таркибига йиғдик», — деди Украинанинг собиқ бош вазири.
Изоҳ (0)