Мадриднинг “Реал” клуби вингери Родриго Гоэс жамоадаги вазиятдан норозилигини билдирган. Испан матбуотининг ёзишича, Родриго янги мураббий Хаби Алонсо қўл остида асосий таркибдан жой ололмаслигидан хавотирда. Бу хавотир Клублар ўртасидаги Жаҳон чемпионатида ҳам ўз тасдиғини топди — Родриго мусобақа давомида фақат битта учрашувда асосий таркибда майдонга тушган.
Жоурналист Хоакин Пьера маълумотларига кўра, футболчи ва клуб президенти Флорентино Перес ўртасидаги муносабатлар кескинлашган. Родриго захира футболчиси мақомига қолишни истамаяпти ва жамоани тарк этишга тайёр. Бироқ “Реал Мадрид” раҳбарияти Родригони сотишга шошилмаяпти ва уни олишни истаган клубларга енгиллик тақдим этмаган.
Ҳозирда Transfermarkt портали Родригонинг бозор қийматини 90 миллион евро деб баҳолаган. Шунга қарамай, клуб футболчини 100 миллион евродан камига сотмаслик ниятида.
Эслатиб ўтамиз, Родриго 2024/25 йилги мавсум “қироллик клуби” сафида 54 та баҳсда майдонга тушиб, 14 гол ва 11 ассист муаллифига айланган. Футболчининг шартномаси 2028 йилнинг ёзига қадар амал қилади.
Изоҳ (0)