Саудия Арабистони Сурия иқтисодиётига 4 млрд доллар сармоя киритишини маълум қилди. Бу ҳақда The National хабар берди.
Сурия пойтахти Дамашқда бугун, 23 июль куни Сурия—Саудия инвестиция форуми бўлиб ўтмоқда. Шу тадбир доирасида икки мамлакат ўртасида 4 миллиард доллар (15 миллиард риал) миқдорида инвестицион келишув имзоланиши режалаштирилган.
Саудия инвестиция вазирлигининг билдиришича, форумда давлат ва хусусий секторнинг кенг иштироки таъминланган. Ушбу ҳаракат Сурия билан иқтисодий муносабатларни яхшилашга қаратилган бўлиб, томонларга ҳамкорлик имкониятларини ўрганишга ёрдам беради. Бундан ташқари, у барқарор ривожланишга кўмаклашувчи келишувлар имзоланишига туртки бўлади.
Саудиянинг юқори даражадаги делегациясига мамлакат инвестиция вазири Холид ал-Фалиҳ бошчилик қилмоқда. Делегация таркибига турли соҳалардан 120 дан ортиқ инвесторлар жалб қилинган. Шунингдек, форумда қўшма лойиҳалар ва икки томон ўртасида англашув меморандумлари имзоланиши кутилмоқда.
Sana нашрининг хабар қилишича, келишув доирасида Дамашқдаги Адра саноат шаҳарчасида Файҳаа цемент заводи лойиҳаси ишга туширилади. Бу цемент ишлаб чиқаришни кенгайтириш ва мамлакатни қайта тиклашни қўллаб-қувватлайди.
Форс кўрфази давлатлари Сурияда Башар Асад режими қулаганидан сўнг, мамлакатга сармоя киритишга ҳаракат қилмоқда. Хусусан, Саудия Арабистони ва Қатар биргаликда Суриянинг Жаҳон банки олдидаги 15,5 миллион долларлик қарзини тўлаб берган. 2025 йил май ойида Қатарнинг UCC Holding компанияси Сурия иқтисодиётига 7 миллиард долларлик инвестиция киритган. Бу мамлакатнинг урушдан кейинги иқтисодиётини жонлантириш учун энергия таъминотини икки баравар оширишга қаратилганди. Шунингдек, Дубайнинг DP World компанияси Суриядаги Тартус портини ривожлантиришга 800 миллион доллар ажратган.
Изоҳ (0)