Халқаро автомобиль федерацияси (FIA) Япония Гран-приси вақтида «Маруся» жамоасининг франциялик пилоти Жюль Бьянкининг аварияси юзасидан суриштирув ўтказган комиссия маълумотларини эълон қилди. Бу ҳақда «Segodnya.ua» хабар бермоқда.
FIA хавфсизлик комиссияси ҳисоботига кўра, Бьянки бошқарувидаги автомобиль соатига 215 километр тезликда трассадан чиқиб кетган ва орадан 2,61 сония ўтиб соатига 126 километр тезликда оғирлиги 6,8 тонна бўлган тракторга бориб урилган.
Дастлаб авария вақтида юклама 62 g га тенг бўлгани ҳақида хабар берилган эди, бироқ суриштирув ишлари давомида дубулғага ўрнатилган узатгичлар тўқнашув вақтида учиб кетгани ва нотўғри натижаларни кўрсатгани маълум бўлди.
Янги ҳисоботга кўра, тўқнашувнинг энг юқори нуқтасида ҳайдовчининг бошига келиб тушган юклама 254 g га тенг бўлган, бу 48 метр баландликдан қулаш билан баробардир. Таққослаш учун, космонавтлар ракета старти вақтида 7 g гача юкламани қабул қилади.
Жюль Бьянки 18 июль куни узоқ давом этган комадан сўнг, ҳушига келмай, вафот этди.
Изоҳ (0)