Сергей Лушан ва Игорь Сергеев июнь ойида Олий лига лауреатларига айланди

Ўзбекистон Профессионал футбол лигаси ва «Championat.asia» ҳамкорлигида ташкил этилган ой лауреатларининг навбатдаги ғолиби аниқланди. Бу ҳақда Ўзбекистон ПФЛ матбуот хизмати хабар бермоқда.

Тошкентнинг «Бунёдкор» клуби бош мураббийи Сергей Лушан 59 овоз олиб, июнь ойининг энг яхши мураббийи деб топилди. Кейинги ўринни 56 очко олган «Пахтакор» клуби бош мураббийи Самвел Бабаян эгаллади. Кучли учликни 50 очко билан «Локомотив» устози Вадим Абрамов якунлаб берди.

Июнь ойида 4 та ўйинда 4 та гол урган «Пахтакор» ҳужумчиси Игорь Сергеев ойнинг энг яхши футболчиси бўлди. Ўзбекистон терма жамоаси ҳужумчиси 47 очко тўплади. Иккинчи ўринни «Қизилқум» ҳужумчиси Бахриддин Ваҳобов банд этди – 40 очко. «Насаф» ҳужумчиси Илҳом Шомуродов 39 очко билан учинчи ўринда қайд этилди.