Ўзбекистоннинг биринчи рақамли теннисчиси Денис Истомин Швециянинг Бастад шаҳрида давом этаётган турнирнинг яккалик баҳсларидаги иштирокини ғалаба билан бошлади. Бу ҳақда «Olamsport.com» хабар бермоқда.
Ўзбекистонлик теннисчи мукофот жамғармаси 439 минг еврога тенг мусобақанинг илк даврасида аргентиналик Диего Шварцманга қарши кортга чиқди. 74 дақиқа давом этган баҳсда Истомин 6:3, 6:4 ҳисобида зафар қучди.
Таққослаш учун, Денис Истомин жаҳон рейтингида 73-, Шварцман эса 66-ўринни эгаллаб турибди.
Истомин 21 июль куни мазкур мусобақанинг жуфтликлар баҳсида франциялик Стефан Робер билан бирга яна бир француз теннисчиси Кенни Де Шеппер ҳамда бразилиялик Рожериу Силва жуфтлигига 7:5, 6:7, тай-брекда 4:10 ҳисобида имкониятни бой бериб қўйганди.
Изоҳ (0)