КХДР ва Жанубий Корея давлати вакиллари 16 июль, пайшанба куни Кесон қўшма саноат комплексида ишловчи шимолий кореялик ишчилар маошининг минимал миқдори масаласидаги музокараларни бошлади. Бу ҳақда «RIA Novosti» хабар беради.
2014 йилнинг июнь ойидан буён биринчи марта қўшма комплекс бошқарув комитети таркибига кирувчи икки давлат вакилларининг учрашуви ташкил этилди.
Жорий йилнинг февраль ойида Пхеньян саноат ҳудудидаги шимолий кореялик ишчиларнинг ойлик маошини 5,18 фоиз — 74 долларгача ошириш тўғрисида бир томонлама қарор қабул қилган эди. Ўз навбатида, Сеул қарорни 2014 йилдаги келишув қоидаларини бузиш, деб ҳисоблади. Унга кўра меҳнат учун ҳақ тўлаш юзасидан ҳар қандай ўзгартиришлар икки томонлама маъқулланиши лозим.
Ҳозирги пайтда Кесонда 55 мингга яқин шимолий кореялик ишчилар ва 120 та Жанубий Корея компанияси фаолият юритмоқда.
Изоҳ (0)