Ўзбекистон Республикаси Президенти Ислом Каримов Шанхай ҳамкорлик ташкилотининг Уфа саммити доирасида 10 июль куни Россия Федерацияси Президенти Владимир Путин билан учрашди, деб хабар қилади ЎзА.
Ушбу учрашув Ўзбекистон билан Россия ўртасида иттифоқчилик муносабатлари ўрнатилганининг 10 йиллигида ўтаётгани ҳамда ҳамкорликнинг барча устувор ва истиқболли йўналишлари бўйича фикр алмашиш учун қулай фурсат экани таъкидланди.
Президентлар сиёсий, савдо-иқтисодий ва гуманитар ҳамкорлик масалаларини муҳокама қилди. Минтақавий хавфсизликка доир долзарб масалалар юзасидан фикр алмашилди.
Ўзбекистон ва Россия ШҲТ ва МДҲ доирасида фаол ҳамкорлик қилаётгани қайд этилди.
Россия Ўзбекистоннинг йирик савдо-иқтисодий ва сармоявий шерикларидан бири эканлиги таъкидланди. Мамлакатлар ўртасида товар айирбошлаш ҳажми изчил ортиб бораётир. 2014 йилда бу борадаги кўрсаткич 6 миллиард доллардан ошган.
Владимир Путин Ислом Каримовни давлат ташрифи билан Россия Федерациясига таклиф этди.
Шу билан Ўзбекистон Республикаси Президенти Ислом Каримовнинг Уфа шаҳрига ташрифи якунига етди.
Изоҳ (0)