Виталий Денисов: Доҳа—2006’да қандайдир шайх ироқлик футболчиларни майдондан олиб чиқиб кета бошлаганди

Ўзбекистон терма жамоаси ва Москванинг «Локомотив» клуби ҳимоячиси Виталий Денисов билан Россиянинг «Championat.com» нашри интервью уюштирди. Бу ҳақда «Championat.asia» хабар қилмоқда.

Виталий Денисов Ўзбекистон терма жамоаларида ўтказган йиллари ичидаги энг ёрқин хотира деб, 2006 йил Қатар пойтахти Доҳада ўтказилган Осиё ўйинларини айтиб ўтди.

«Бу Олимпиадага ўхшаш турнир, аммо фақат Осиё жамоалари ўртасида. Ўшанда жамоамиз таркиби жуда кучли эди: Марат Бикмаев, Анзур Исмоилов, Тимур Кападзе, Сервер Жепаров, Игорь Таран, Александр Гейнрих. Теннисчи, баскетболчи, боксчи ва бошқалар билан катта Олимпия қишлоғида яшаганмиз. Зўр вақтлар эди.

Ўшанда чорак финалгача етиб борганмиз. Ироқ билан ўйнадик. Биринчи бўлиб гол ўтказиб юбордик, аммо биринчи бўлимнинг охирида Гейнрих ҳисобни тенглаштирди. Иккинчи бўлим бошида ҳакам гол урган ироқлик футболчини четлаштирди. Ўшанда қандайдир шайх майдонга тушиб, футболчиларни майдондан олиб чиқиб кета бошлади.

Мураббий уни тинчлантиришга уринди. Кейин шайх ҳакамларни чақириб олиб, улар билан суҳбатлашди ва ўйин давом этди. Суҳбатдан сўнг ҳакамлик жуда ёмон бўлди. Рефери бизга қарши ишлади. Асосий футболчиларимизга сариқ карточка берди, адашмасам, кимнидир четлатди ҳам. Натижада қўшимча вақт бўлди ва бу бўлимда Ироқ гол урди. Биз мағлуб бўлдик», — деди Виталий Денисов.