Қрим ҳуқуқни муҳофаза қилиш органлари 2015 йилнинг дастлабки олти ойида коррупция ҳолатларига алоқадор 120та жиноят иши очди. «РИА Новости»нинг Қрим прокурори Наталя Поклонскаяга асосланиб хабар қилишича, мазкур жиноят ишларининг ярмидан ортиғи порахўрлик билан боғлиқ.
Коррупция ҳолатлари бўйича гумон қилинаётганлар орасида маҳаллий полициянинг 13 ходими, Қрим божхонасининг икки вакили, шунингдек, солиқ хизматининг бошлиғи бор. Жумладан, Қрим солиқ хизмати раҳбари Николай Кочанов душанба куни пора олаётган вақтида далилий ашё билан қўлга тушди.
Поклонскаянинг қайд этишича, Қримнинг собиқ транспорт вазири Анатолий Суркин ва саноат сиёсати вазири Андрей Скринникка нисбатан жиноят ишлари очилди, Песчаное қишлоқ кенгаши ва Киров тумани кенгашининг икки депутати, шунингдек, Қримнинг учта қишлоқ кенгашлари маъмуриятлари раҳбарларига қарши тергов ҳаракатлари олиб борилмоқда.
Қрим прокуратурасининг маълум қилишича, турли даражадаги амалдорларнинг коррупциявий ҳаракатлари натижасида давлатга юз миллионлаб рубль миқдорида зарар етказилган. Қайд этиш жоиз, сешанба куни Қрим раҳбари Сергей Аксёнов республикада ҳокимият органларини коррупционерлардан тозалаш ишлари олиб борилаётганини маълум қилганди.
Изоҳ (0)