2015—2016-ўқув йилида Ўзбекистон ОТМларига янги талабаларнинг 67 фоизи шартнома асосида қабул қилинади

2015 йил 23 июнь куни Ўзбекистон Республикаси Президенти «2015—2016-ўқув йилида Ўзбекистон Республикасининг олий таълим муассасаларига қабул тўғрисида»ги қарорга имзо чекди, деб хабар бермоқда «Xushnudbek.uz».

Президент қарорида таъкидланишича, акциядорлик жамиятларида замонавий корпоратив бошқарув услубларини ҳисобга олиб ишлаб чиқилган хизматчиларнинг асосий лавозимлари ва ишчилар касбларининг янгиланган классификатори тасдиқланганлиги муносабати билан бакалавр тайёрлашнинг 7 та янги йўналишлари жорий этилган.

Шунингдек, қарорда олий таълим муассасаларига талабаларни қабул қилиш квотаси белгилаб берилган бўлиб, унга кўра 2015—2016-ўқув йилида бакалавр таълим йўналишига 57 907 нафар талаба қабул қилинади. Шуларнинг 19 120 нафари давлат грантида (33,02 фоизи) ва 38 787 нафари тўлов-контракт бўйича (66, 98 фоизи) таҳсил олади. Агар ўтган йилги квоталар билан таққосласак, жорий йилги квоталар сонида ўзгариш бўлмаган.

Жорий йилда олий таълим муассасаларига 5 000 нафар магистр, шундан 1 548 нафари давлат гранти (30,96 фоизи), 3 452 нафари эса тўлов-контракт асосида (69,04 фоизи) ўқишга қабул қилиниши белгиланган. Магистратура квоталарида ҳам ўтган йилгига қараганда ўзгариш кузатилмаган.

Тошкент кимё-технология институти (Қўнғирот бўлими)нинг махсус сиртқи бўлимига давлат гранти бўйича 65 нафар ва Тошкент ахборот технологиялари университетининг махсус сиртқи бўлимига тўлов-контракт асосида 50 нафар талаба қабул қилинади (ўтган йили 15 нафари давлат гранти, 35 нафари шартнома асосида эди).

Айтиб ўтиш жоизки, ўтган йили ҳужжат топширган абитуриентлар сони бўйича рекорд натижа қайд этилган эди. Яъни 540 минг нафардан кўпроқ абитуриент талабалик бахтига мушарраф бўлиш учун ўз омадини синаб кўришга аҳд қилган эди. Бу бир ўрин учун ўртача 9,4 киши даъвогарлик қилган деганидир.

Эслатиб ўтамиз, жорий йилдаги қабул жараёнларига бағишлаб, «Дарё» интернет-нашри ва «Xushnudbek.uz» сайтлари ҳамкорликда махсус «Абитуриент—2015» лойиҳасини ташкил этди. Бунда қабул комиссияси фаолияти билан боғлиқ янгиликлар, маълумотлар, бўлажак талабаларга маслаҳат ва тушунтиришлар бериб борилади.