«Барселона» ҳужумчиси Лионель Месси 28 ёшга тўлди

Бугун, 24-июнь куни жаҳон футболининг ёрқин юлдузларидан бири Лионель Месси ўз таваллуд айёмини нишонламоқда, деб хабар беради «Interfutbol.uz».

Футболчи ҳақида гап кетса, у Аргентина миллий терма жамоаси ва «Барселона» клубининг ҳужумчиси саналади. 2011 йилнинг ёзидан бери эса миллий терма жамоада сардор сифатида ўз фаолиятини олиб бормоқда. Замонавий футбол ва футболнинг барча даврларидаги энг яхши ўйинчилардан бири сифатида тан олинган.

Туғилган санаси, ватани : 1987 йил 24 июнь, Росарио, Аргентина.

Турмуш ўртоғи: Антонелла Рокуццо (2008 йилдан буён).

Фарзанди : Тьяго Месси

Йиллик маоши 20 миллион еврони ташкил қилади (2014 йилдан буён).

«Барселона» клубининг тарбияланувчиси. (17 ёшидан бери асосий таркиб футболчиси). У Каталония клуби билан ҳозиргача 4 бор Европа Чемпионлар Лигасини (2005/06, 2008/09, 2010/11, 2014/15), етти бор Испания чемпионатини (2004/05, 2005/06, 2008/09, 2009/10, 2010/11, 2012/13, 2014/15), 3 бор Испания Кубогини (2008/09, 2011/12, 2014/15), 6 бор Испания Суперкубогини (2005, 2006, 2009, 2010, 2011, 2013), 2 бор Европа суперкубогини (2009, 2011), яна 2 бор Халқаро клублар ўртасидаги жаҳон чемпионатини (2009, 2011) ютган.

Беш бор ЕЧЛнинг энг яхши тўпурари (2008/09, 2009/10, 2010/11, 2011/12, 2014/15) бўлган. Қолаверса, футбол тарихида беш бор кетма-кет ЕЧЛ тўпурари бўлган ягона футболчи. Яна у «Олтин тўп» совринини тўрт бор қўлга киритган ягона футболчи ҳисобланади.