Исроил вазирининг рафиқаси Обама ҳақидаги твит учун кечирим сўради

Исроил ички ишлар вазирининг рафиқаси, радиобошловчи Жуди Шалом Нир-Мозес Twitter’да АҚШ президенти Барак Обама ҳақида қилган ҳазили учун кечирим сўради, деб хабар беради «Nur.kz». Унинг ёзувини кўпчилик ирқчилик сифатида қабул қилганди.

Вазирнинг хотини твитни ўчириб ташлади ва «аҳмоқона ҳазили» учун узр сўради.

Олдинроқ Twitter’да 75 минг обуначига эга Жуди Шалом Нир-Мозес ўз микроблогида «‘Обама қаҳваси’ нима эканлигини биласизми? У қора ва кучсиз», деб ёзганди.

Радиобошловчининг эри, Исроил ИИВ раҳбари Сильван Шалом май ойида бош вазир Биньямин Нетаньяху томонидан фаластинликлар билан тинчлик музокаралари ўтказишга ва АҚШ билан стратегик муносабатларга масъул этиб тайинланганди.

Жуди Шалом Нури-Мозес бу ҳазили унинг оиласини бузилишига олиб келмаслигига умид қилди.

«Кимнидир хафа қилган бўлсам, бунинг учун узр сўрайман. Турмуш ўртоғим самолётдан тушиб, қилган ишимдан хабар топганидан кейин ҳам эрли хотин бўлиб қолишга умид қиламан», — деб ёзди радиобошловчи.