Тошкентда 800 дан ортиқ фирибгар фолбин ва сохта табиблар фаолият юритиши маълум бўлди

Ўзбекистон фуқароларидан алдов йўли билан пул ундираётган фирибгар фолбинлар ва сохта табиблар кўпайиб бормоқда, деб ёзади «12news.uz».

Халқ табобати академияси раиси Муҳаммаджон Ҳамроев сўзларига кўра, Тошкент шаҳрининг ўзидагина 800 дан зиёд қаллоб фолбин ва сохта табиблар бор.

«‘Қабристон фолбини’нинг донғи бутун пойтахт бўйлаб, ҳатто ундан ташқарига ҳам ёйилди. Фирибгарнинг иш принципи оддий: у мижозларининг барчасини қабристонга олиб келади, дуч келган қабрдан турли буюмлар — мих, тақа бўлаги, қўғирчоқ ва ҳатто бош суягини тортиб чиқаради. Топилмани мижозга кўрсатиб, у унинг душмани томонидан жоду қилингани айтади ва буюмни сувга ташласа, сеҳр-жодудан қутулишини таъкидлаб, эвазига катта миқдорда пул сўрайди, — деди М. Ҳамроев. — Қанчалаб содда одамлар уларга ишониб, пулларидан айрилгани эса ҳеч кимни қизиқтирмайди».