«Ўзэкспомарказ»да геология, ёқилғи-энергетика, кимё, нефть-кимё ва металлургия саноати ҳамда ахборот тизимлари ва телекоммуникациялар масалалари комплексларининг тармоқ саноат ярмаркаси очилди, деб хабар беради «ЎзА».
2014 йилги форумда 250 дан ортиқ корхона иштирок этиб, қарийб икки минг турдаги янги маҳсулотларни тақдим этган эди. Уларнинг 90 тури Маҳаллийлаштириш дастури бўйича ўзлаштирилган янги маҳсулотлардир. 2015 йилда иккита йирик комплексни бирлаштирган кўргазмалар майдонида 300 дан ортиқ саноат корхонаси 2,5 минг турдан ортиқ маҳсулотларни намойиш қилмоқда. Уларнинг 100 тури янги маҳсулотлардир.
«Ўзбекнефтгаз» миллий холдинг компанияси маълумотларига кўра, 2014 йилда янги турдаги буюмларни ишлаб чиқариш технологияларини ўзлаштириш ҳисобига 12 лойиҳа бўйича маҳаллийлаштирилган маҳсулотлар ишлаб чиқаришнинг умумий ҳажми 28,3 миллиард сўмдан ортди. Маҳаллийлаштириш самараси эса 13,2 миллион доллардан зиёдни ташкил этди. Жорий йилда Маҳаллийлаштириш дастури доирасида соҳадаги 30 лойиҳа бўйича маҳсулотлар ишлаб чиқариш ҳажми 87,7 миллиард сўмдан ошади. Айни пайтда иқтисодий самара 36,3 миллион доллардан кўпроқни ташкил этади.
Тармоқ саноат ярмаркасида Ахборот тизимлари ва телекоммуникациялар масалалари комплексининг 30 га яқин корхонаси қатнашмоқда. Улар рақамли телевидение приёмниклари, турли хил модемлар, IPTV-приставкалар ва мултиплексорлар, стационар ва мобил телефонлар ҳамда бошқа турдаги юқори технологияли маҳсулотларни намойиш этмоқда.
Ярмарканинг очилишида Ўзбекистон Республикаси Бош вазирининг ўринбосари Ғ.Ибрагимов сўзга чиқди.
Изоҳ (0)