Ўзбекистон Футбол Федерацияси президенти Мираброр Усмонов Ўзбекистон U-20 терма жамоаси футболчилари ва мураббийлар штабини Жаҳон чемпионати чорак финалига чиққани билан табриклади, деб хабар беради Ўзбекистон футбол федерацияси матбуот хизмати.
Телефон орқали суҳбатда ЎФФ президенти терма жамоа футболчилари Австрия устидан қозонилган ғалаба орқали ушбу ёш тоифасида дунёнинг энг кучли 8 та терма жамоаси сафига кира олгани — Ўзбекистон футболи қўлга киритган навбатдаги ютуқ эканини алоҳида таъкидлади. Ўзбекистон футболи мавқеини жаҳон ареналарида ажойиб тарзда намойиш этаётгани ва ўзбек футболи шаънини муносиб ҳимоя қилаётгани учун ЎФФ президенти барча ўзбек халқи номидан ёшлар терма жамоасига миннатдорчилик билдирди. Суҳбат давомида Мираброр Усмонов бу натижа билан тўхтаб қолмасликни ва терма жамоа янада юқорироқ марраларни забт этиши учун навбатдаги ўйинда футболчиларга ғалаба тилади ҳамда ушбу ғалаба ўзбек футболи тарихига янги саҳифа олиб киришини эслатиб ўтди.
Шунингдек, Австрияга қарши баҳс якунига етгач, ЎФФ биринчи вице-президенти Сардор Раҳматуллаев, ЎзПФЛ бош директори Фарҳод Магаметов, Ўзбекистон миллий терма жамоаси бош мураббийи Миржалол Қосимов ҳамда миллий терма жамоа мураббийлар штаби бугунги ғалаба билан телефон орқали Ўзбекистон ёшлар терма жамоасини ғалаба билан табриклади ва навбатдаги ўйинлар олдидан ғалаба тилади.
Эслатиб ўтамиз, ёшлар ўртасидаги ЖЧнинг нимчорак финалида Ўзбекистон Австрияни 2:0 ҳисобида мағлубиятга учратди.
Изоҳ (0)