O‘zbekiston Futbol Federatsiyasi prezidenti Mirabror Usmonov O‘zbekiston U-20 terma jamoasi futbolchilari va murabbiylar shtabini Jahon chempionati chorak finaliga chiqqani bilan tabrikladi, deb xabar beradi O‘zbekiston futbol federatsiyasi matbuot xizmati.
Telefon orqali suhbatda O‘FF prezidenti terma jamoa futbolchilari Avstriya ustidan qozonilgan g‘alaba orqali ushbu yosh toifasida dunyoning eng kuchli 8 ta terma jamoasi safiga kira olgani — O‘zbekiston futboli qo‘lga kiritgan navbatdagi yutuq ekanini alohida ta’kidladi. O‘zbekiston futboli mavqeini jahon arenalarida ajoyib tarzda namoyish etayotgani va o‘zbek futboli sha’nini munosib himoya qilayotgani uchun O‘FF prezidenti barcha o‘zbek xalqi nomidan yoshlar terma jamoasiga minnatdorchilik bildirdi. Suhbat davomida Mirabror Usmonov bu natija bilan to‘xtab qolmaslikni va terma jamoa yanada yuqoriroq marralarni zabt etishi uchun navbatdagi o‘yinda futbolchilarga g‘alaba tiladi hamda ushbu g‘alaba o‘zbek futboli tarixiga yangi sahifa olib kirishini eslatib o‘tdi.
Shuningdek, Avstriyaga qarshi bahs yakuniga yetgach, O‘FF birinchi vitse-prezidenti Sardor Rahmatullayev, O‘zPFL bosh direktori Farhod Magametov, O‘zbekiston milliy terma jamoasi bosh murabbiyi Mirjalol Qosimov hamda milliy terma jamoa murabbiylar shtabi bugungi g‘alaba bilan telefon orqali O‘zbekiston yoshlar terma jamoasini g‘alaba bilan tabrikladi va navbatdagi o‘yinlar oldidan g‘alaba tiladi.
Eslatib o‘tamiz, yoshlar o‘rtasidagi JChning nimchorak finalida O‘zbekiston Avstriyani 2:0 hisobida mag‘lubiyatga uchratdi.
Izoh (0)