Фарғона вилояти Ўзбекистон тумани Яйпан шаҳрида яшовчи шахс ғайриқонуний валюта савдоси жиноий жавобгарликни келтириб чиқаришини яхши билган бўлса-да, унинг нафси ҳакалак отиб, боши берк кўчага етаклади, деб хабар беради «Ҳуқуқ» газетаси.
Яйпан—Фарғона йўналишида қатнайдиган ҳайдовчи икки нафар йўловчининг «мушкулини осон» қилиш учун уларни валютафурушнинг уйига бошлаб келди.
Остонада нархларни ўзаро келишиб олганларидан кейин харидорлар икки сумка пулларни машинадан тушириб, ҳовлидаги сўрига олиб кириб қўйди. Валютафуруш ўғли билан эринмасдан 45 миллион сўмни санаб олди. Сўнгра харидорларга 14 минг 800 АҚШ долларини санаб берди. Харидорлар кўчага чиқиб кетган заҳоти уйга СВОЖЖДЛҚК департаментининг туман бўлими ходимлари холислар билан кириб келиб, тезкор тадбир ўтказилганини айтди. «Валютачи» ҳозиргина санаб олган пулларини ихтиёрий топширди.
Суд мажлисида айбланувчи уч-тўрт ойдан буён ғайриқонуний валюта савдоси билан шуғулланиб келганига иқрор бўлди. Собиқ педагогнинг ҳуқуқбузарлиги қимматга тушди. Унга суд ҳукми билан жарима жазоси тайинланиб, ашёвий далил тарзида олинган пуллари давлат эгалигига ўтказилди.