«Орёл и решка» кўрсатуви Ўзбекистонга ташриф буюрди

Украинанинг машҳур «Орёл и решка. Шоппинг» телекўрсатуви ниҳоят Ўзбекистонга ташриф буюрди, деб хабар қилади «Kultura.uz».

Кўрсатув ғояси қуйидагича: ҳар ҳафта икки бошловчи шоппинг учун дунёнинг турли шаҳарларига боради, улардан бирига пул миқдори чегараланмаган «олтин банк картаси», иккинчисига эса бор-йўғи 100 доллар берилади. Ким нимани олиши эса танга ташлаш орқали аниқланади. Агар «бургут» тушса бошловчи олтин картани, акс ҳолда 100 долларни олади.

Дастур давомида бошловчилар телетомошабинларни шаҳарнинг диққатга сазовор жойлари, ўзлари яшаётган меҳмохона ва унинг нархлари билан таништиради. «Орёл и решка. Шоппинг»нинг Facebook тармоғидаги саҳифасида телетомошабинлар нархи 100 доллардан ошмайдиган совға сўраши мумкин. Энг ноёб совғалар телетомошабинга жўнатилади. Дастурнинг Facebook’даги саҳифасида Ўзбекистондан совға танлаш бошлангани маълум қилинди.

Бошловчилар ҳозиргача Бухоро ва Самарқандда бўлишга улгурди.