27 май куни Осиё Чемпионлар Лигасида 1/8 финал босқич ўйинлари якунига етди. Учрашувлардан кейин Осиё футбол конфедерациясининг коэффициентлар жадвалида ўзгаришлар рўй берди. Бу ҳақда БАА чемпионати менежери Алишер Никимбаевга таяниб, «Championat.asia» хабар қилмоқда.
Қатарнинг «Лахвия» клуби кейинги босқич йўлланмасини қўлга киритиши натижасида ғарбий минтақада тўртинчи ўринда бўлган Ўзбекистон бешинчи поғонага тушиб кетди. Бу эса 1+2 кўринишидаги йўлланма дегани, яъни олий лига чемпиони тўғридан-тўғри Осиё Чемпионлар Лигаси гуруҳ босқичига чиқади, Ўзбекистоннинг яна икки жамоаси эса саралаш босқичида иштирок этади.
2015 йилда қайд этилган натижалар ўз навбатида 2017—2020 йиллар учун амал қилади. Бу тўрт мавсум дегани. Шундай бўлса-да, Ўзбекистон тўртинчи ўринга кўтарилиш имкониятига эга. Бунинг учун «Лахвия» 1/4 финал босқичда омадсиз иштирок этиши ва аксинча Ўзбекистон миллий терма жамоаси жорий йил бўлиб ўтадиган барча расмий ўйинларда ижобий натижага эришиб, ФИФА рейтингида кўпроқ очкога эга бўлиши керак. Шундагина Ўзбекистон олий лигаси клублари 2+2 кўринишдаги йўлланмага эга бўлади.
Эслатиб ўтамиз, 2016 йил ҳам Ўзбекистон олий лигаси 3+1 кўринишда жойга эга. Аммо кейинги йилги натижалар ўринлар сонига ўзгартириш кирита олмайди.
Изоҳ (0)