Қуддус суди Исроил собиқ бош вазири Эхуд Ольмертни коррупция иши бўйича айбдор деб топди ва саккиз ойга озодликдан маҳрум қилиш жазоси ҳамда 25 минг доллар миқдорида жарима тўлашни тайинлади. Бу ҳақда ТАСС хабар бермоқда.
Собиқ бош вазири мазкур жиноят иши бўйича 2012 йил июлида оқланган эди. Бироқ 2015 йил 30 мартида иш қайта кўриб чиқилди, суд уни америкалик ишбилармон Моррис Таланскидан пора олганликда айбдор деб топди.
Прокурорларнинг маълум қилишича, Эхуд Ольмерт алдов йўли билан, Моррис Таланскининг бизнесини қўллаб-қувватлашга ваъда бериб, ундан умумий ҳисобда 600 минг доллардан ортиқ пул олган.
Эхуд Ольмерт 2014 йил май ойида бошқа бир коррупция иши бўйича айбдор деб топилган ва олти йилга озодликдан маҳрум этилганди. Ўшанда у Қуддусдаги «Холиленд» турар-жой мажмуаси қурилиши учун пора олганликда айбдор деб топилганди.
Изоҳ (0)