Москвада ёш келин-куёвларга ФҲДЁга БТРда боришни таклиф қилишмоқда

Москвада ёш келин-куёвларга ФҲДЁ бўлимига зирҳли транспортёр (БТР)да боришни таклиф қилишни бошлашди, дея хабар бермоқда «TASS».

Тўй кортежи учун бундай транспорт воситасини тақдим этишни таклиф этаётган тўй агентлиги вакилининг сўзларига кўра, ёш келин-куёвлар учун БТРни ижарага олиш нархи 100 минг рублдан бошланади.

«Барчаси ФҲДЁ бўлимигача бўлган йўлга боғлиқ. Агар сиз Москванинг марказий кўчалари бўйлаб ҳаракатланадиган бўлсангиз, у ҳолда зирҳли техника ижараси қимматроқ бўлади, чунки кўчалар бўйлаб йўналишни ўтказиш масалаларини йўл-патрул хизмати ходимлари билан ҳал қилиш керак бўлади», - деди фирма менежери.

Айни вақтда, унинг сўзларига кўра «агар ФҲДЁ бўлими шаҳар атрофида жойлашган бўлса, югур-югурлар ҳам оз, зирҳли техника ижараси учун харажатлар ҳам камроқ бўлади». Қўшимча тўлов эвазига агентлик ходимлари БТРларни вилоятларга жўнатишга ҳам тайёр.

Агентлик вакилининг таъкидлашича, фирмада БТРлардан тўй кортежлари таркибида фойдаланиш ҳуқуқини берувчи барча рухсатнома ҳужжатлари бор. ТАССнинг қўшимча қилишича, интернет-сайтларда тўй агентликлари эгаларига фойдаланилган БТРларни 1,5 миллион рублдан сотиб олишни таклиф қилишмоқда.