Жанубий кореялик ўқитувчи ўқувчилар олдида оғмахонни еб қўйди

Жанубий Кореянинг Чонип шаҳридаги мактаб-интернат ўқитувчиси ҳаёт қадри ҳақида тушунча бериш мақсадида ўқувчилар кўз олдида оғмахонни ўлдириб, еб қўйди. Бу ҳақда The Korea Times хабар бермоқда.

Исми ошкор этилмаётган 44 ёшли эркак, бир қатор болалар жониворларнинг асабига тегиб, уларни таҳқирлаганини билиб қолганидан сўнг ўқувчиларнинг «ақлини киритиб қўйиш мақсадида» шундай қилган.

Ўқитувчи томонидан жониворнинг ўлдирилишини етти нафар бола томоша қилган. The Korea Times маълумотларига кўра, ўқитувчи ўқувчилар олдида ахлоқсиз сўзлардан фойдаланиб гапирган.

Юз берган ҳодиса ҳақида бошқа ўқитувчилар хабар топганидан сўнг, 44 ёшли ўқитувчи интернатни тарк этишга мажбур бўлган. Шу дарсда бўлган ўқувчиларнинг ота-оналари ўқитувчи устидан полицияга шикоят қилишган. Унга қарши болаларга шафқатсиз муносабатда бўлиш моддаси бўйича иш қўзғатилган. Ўқитувчи қандай жазога тортилиши мумкинлигига аниқлик киритилмаяпти.

Кейинроқ ўқитувчи ўз қилмиши учун болалардан, уларнинг ота-оналари ва ўқитувчилардан кечирим сўраган. Бир қатор ўқитувчиларнинг қайд этишларича, мактабнинг бир қатор ходимлари болалардан бу ҳодиса ҳақида ҳеч кимга чурқ этмасликни сўрашган.