Актёр Жавоҳир Зокиров ўзининг Facebook’даги саҳифаси орқали Наргиз Зокированинг Instagram ижтимоий тармоғида танқидли изоҳ ёзган фойдаланувчиларга қарата айтган жавобига изоҳ берди.
«Ҳозир менинг опамни ҳақорат қилишди, мен жим тура олмайман. Одамлар икки лагерга бўлиниб олган — ундан нафратланидаганлар ва унга қойил қоладиганлар. Кўпчилик унинг Ўзбекистон ҳақида ёзганларини ҳақорат, ундан ҳам ёмони Ватанга хиёнат деб ўйлаб ғазабланяпти. Лекин сиз фақатгина айсбергнинг учини кўряпсиз. Сўнгги икки йил давомида у кўплаб ҳақоратомуз гапларни эътиборсиз қолдирганига мен шахсан гувоҳ бўлдим. Бундай изоҳлар бизнинг ватандошларимиз томонидан қолдирилган. Бу одамларнинг иккиюзламачилиги, ҳасади мен учун уятли эди. Мен шахсан аҳолимизнинг бу қисмига опам нима ёмонлик қилганига тушунмайман. Сочи олингани ёки татуировкалари учунми?
Ўзбекистон — биз учун ўз уйимиз ва болаларимиз бўлса, Наргиз учун ёмон хотиралар мамлакати. Таҳдид ва ҳақоратлар ёғдираётган одамлар эса мамлакатимизнинг салбий образини янада илдиз орттирди. Аслида бу ажойиб ўлкада яхши одамлар яшайди, улар тарбияси кучлилигидан жоҳил ёввойиларнинг гапларини кесиб ташлашдан андиша қилади. Бу ёввойилар эса бирорта тилда ҳам тўғри ёза олмайдиган, сўкинишдан бошқа сўзларни билмайдиган, айниқса Исломдек ҳикматли дин ҳақида чуқур тушунчага эга бўлмаган одамлардир.
Наргиз узоқ вақт жим турди ва ҳамюртларимизнинг ҳужумларига эътибор бермасликка уринди. Унга ёмон нарсаларни ёзганлар — ўзимизникилар. Ўтган йили дунёга келган набирасининг фотосурати остига қарғиш сўзлари ёзилгач эса унинг сабр косаси тўлди. Топинг-чи, уларнинг муаллифлари кимлар? Ўзбеклар. «Сен етим эмассан»ни ёзган Ғафур Ғулом каби ўзбеклар, уруш вақтида бутун иттифоқдан келган болаларни асраб олганлар каби ўзбеклар, ўз фарзандларини жонидан ортиқ кўрувчи ва оила қадриятларини муқаддас деб ҳисобловчи ўзбеклар.
Мен Наргизни яхши кўришни, ҳаттоки уни ва ҳақиқатан ҳам мамлакатимиз маданияти ривожига улкан ҳисса қўшган оиламизни ҳурмат қилишни сўрамайман. Мен фақатгина кўпроқ одамлар ўз юракларини очиб, уни нафратдан тозалашларини сўрайман. Ахир ҳақиқий имонли одам ўз қарашларига тўғри келмайдиган кишиларга ҳам ёмонлик қилмайди», — деб ёзган Зокировлар оиласининг вакили.
Эслатиб ўтамиз, Наргиз Зокирова Instagram’даги саҳифасида фойдаланувчилардан ўзини ўзбекистонлик деб атамасликни талаб қилгани хабар берилган эди. Кейинроқ, хонанда уни нотўғри тушунганлардан узр сўраб, ғазаби фақат уни ҳақоратлаганларга қаратилгани, ҳали ҳам Ўзбекистонни ўз Ватани деб билишини маълум қилган.
Изоҳ (0)