Наргиз Зокирова Instagram саҳифасида ўз ҳамюртларига нисбатан қизишиб кетганини тан олди, дея хабар бермоқда «Super.ru». Хонанда нашрга интервью бериб аниқлик киритишича, унинг ғазаби фақат уни ҳақоратлаганларга қаратилган. Наргиз ҳали-ҳамон ўз ватани сифатида Ўзбекистонни эътироф этади.

«Суратларимга турли ифлос гаплар ёзишганида чидаб, индамай туришим мумкин, чунки менинг қиёфам кўпчилик ҳамюртларим учун тушунарсиз эканлигини англайман… Бироқ набирамнинг расмини жойлаганимда ҳам улар ёмон маънодаги изоҳлар қолдиришди. Кеча кун бўйи йиғладим. Уларни ўқиш қанчалик қийинлигини тасаввур ҳам эта олмайсиз», — дея ўз хатти-ҳаракатини изоҳлади хонанда.

Наргиз ватандошларига ушбу постни жаҳл устида ёзганини билдирмоқчилигини айтди. «Тўғри, балки мен ўзимга мос бўлмаган вақт ва жойда туғилгандирман, балки ҳамюртларим тушунчасига мос эмасдирман. Лекин қандай қилиб ўзим туғилиб-ўсган ва ота-онам яшаётган ватанимни ёмон кўра оламан? Шу миллат шарофати билан дунёга келдим. Бироқ кўплаб ҳамюртларим мени улардек бўлмаганим учунгина умр бўйи ёмон кўриб келгани менга жуда алам қилади. Ахир шу туфайли мен ўз ватанимни тарк этишимга тўғри келган», — дея ҳисларини тўкиб солди у.

«Бу ҳақиқатан менинг ватаним, менинг аждодларим, мен ўзбеклигимдан фахрланаман. Мени нотўғри тушунган кишилардан узр сўрайман, бу бутун Ўзбекистонга қаратилмаган эди», — дея гапларига якун ясади Наргиз.

Эслатиб ўтамиз, аввалроқ Наргиз Зокирова Instagram саҳифасида танқидли изоҳлар қолдирган ўзбекистонлик фойдаланувчиларга қарата жавоб ёзган ва уни асли ўзбекистонлик деб атамасликларини талаб қилган эди.