Тошкентда HTC One М9 смартфони 3,4 млн сўмдан сотила бошлади

Ўзбекистонда HTC компаниясининг янги флагман смартфони — One М9 сотила бошлади, дея хабар бермоқда «Mobinfo.uz».

Аввалроқ март бошида тақдим этилган янги HTC One М9 смартфони (32 Гб хотиралиси)га 650 доллар нарх белгилангани, у 25 мартдан сотила бошлаши хабар берилган эди.

Тошкентнинг «Флешка» савдо мажмуасида эса янги смартфонни (32 Гб хотиралиси) 3,4 миллион сўмдан харид қилиш мумкин.

Янги қурилманинг аввалги моделдан асосий фарқи шундаки, унда ультрапикселли асосий камера ўрнига 20 мегапикселли фотомодуль ўрнатилди. Ультрапикселли камера эса олд панелга ўтди.

Янги HTC флагмани 3 Гб тезкор хотира, 8 ядроли Qualcomm Snapdragon 810 процессори, 2840 мА/с сиғимли аккумуляторга эга бўлди. Смартфон Android 5.0 операцион тизимида ишлайди.