Ўзбекистон миллий терма жамоаси бош мураббий Миржалол Қосимов Жаҳон чемпионати 2-саралаши ва Осиё Кубоги−2019 учун қуръа натижаси борасида фикр билдирди, деб хабар бермоқда «Championat.asia».
Эслатиб ўтамиз, Ўзбекистон терма жамоаси “H” гуруҳида Баҳрайн, Филлипин, КХДР ва Яманга қарши кураш олиб боради.
«Қуръадан кўнглим тўлди. Бизнинг гуруҳимизда куч жиҳатдан тенг жамоалар йиғилди ва биз қизиқарли учрашувлар гувоҳига айланишимиз мумкин. Мақсадимиз - биринчи ўринни эгаллаб, жаҳон чемпионатида иштирок этиш учун курашни давом эттириш. Биз гуруҳда етакчи ҳисобланамиз ва бу вазифани бажара оламиз.
Ҳар бир жамоа ҳақида алоҳида гапирадиган бўлсак, рақибларимиз борасида қуйидагиларни айтишим мумкин:
Баҳрайн кучли ва бизга таниш жамоа. Бу терма жамоанинг имкониятларини, тахминан қандай услубда ўйнашини биламиз, чунки улар билан бир неча марта учрашув ўтказганмиз. КХДР терма жамоаси билан ҳам кураш олиб борган эдик. Уларга қарши ўйнаш осон эмас, аммо шимолий кореяликларни мағлуб эта олдик. Филиппин ва Яман терма жамоалари ҳақида ҳеч нарса дея олмайман, чунки Филиппин билан бирор марта ўйнамаганмиз, Яман билан эса 90 йилларда бор-йўғи икки марта тўқнаш келганмиз» − дейди Миржалол Қосимов.
Ўзбекистон терма жамоаси саралашни меҳмонда КХДР терма жамоасига қарши ўйин билан бошлайди. Бу борада Қосимов қуйидагиларни таъкидлади:
«Биринчи учрашув доимо қийин бўлади. Аммо ҳар қандай турнирни ғалаба билан бошлаш жуда муҳим. Жамоамиз жуда аҳил ва иқтидорли футболчилардан ташкил топган. Биринчи ўйинда 3 очко олишга кучимиз етади» − деди Қосимов.
Изоҳ (0)