Аввал хабар берганимиздек, Тошкентда айни кунларда хонанда Райҳоннинг концерт дастури бўлиб ўтмоқда. Ундан турли «сюрприз»лар ўрин олди. Улардан бири Райҳоннинг ўз ҳамкасби Лола билан куйлаган дуэти бўлди.
Дугоналар биргаликда «Кўникмадим» номли қўшиқни куйлади. Бунгача ушбу композиция ҳеч қаерда жаранг сочмаган эди.
Таъкидлаш жоиз, концертда нафақат ушбу дуэтнинг ўзи, балки уни саҳнада куйлаш чоғида Лоланинг эгнида бўлган либос ҳам шов-шувга сабаб бўлди.
Узун кесим туширилган ва орқаси белигача очиқ қизил кўйлак интернет фойдаланувчилари орасида баҳс-мунозарани келтириб чиқарди. Баъзилар бундай либоснинг миллий менталитетга тўғри келмаслигини, замонавийлик ортидан қувиб миллийликни унутиш керак эмаслигини ёзган. Кимдир эса, аксинча, Лолани бундай жасорати учун мақтаб, «бундай кўйлакни бажара олган киши кийиши»ни таъкидлаган. Яна баъзи фойдаланувчилар қандай кийим кийиш ҳар кимнинг ўз танлови эканлигини айтиб, бировнинг ишига бурун суқмасликка чақирган.
Лоланинг Facebook саҳифасидаги постга кўра, ушбу либос дизайнери Зулфия Султон ҳисобланади. Қўшиқчи мазкур дизайнер билан анчадан буён ҳамкорлик қилиб келади, кўплаб концерт ва тадбирларда кийган кийимлари муаллифи айнан Зулфия Султондир.
Эслатиб ўтамиз, Райҳоннинг концертидаги асосий шов-шув унинг саҳнадаги катта монитор орқали ўз эгизакларини илк бора оммага намойиш этгани бўлди.
Изоҳ (0)