Ўзбекистон «Миллий тикланиш» демократик партиясидан Ўзбекистон Республикаси Президентлигига номзод Акмал Саидов 20 февраль куни Қорақалпоғистон Республикаси ҳамда Хоразм вилояти сайловчилари билан учрашди, деб хабар бермоқда Ўзбекистон Миллий ахборот агентлиги.
Нукус шаҳридаги учрашувни Ўзбекистон Республикаси Президенти сайловини ўтказувчи 1-Қорақалпоғистон округ сайлов комиссиясининг раиси К. Каримов очди. Президентликка номзоднинг ишончли вакили Й. Қутибоева йиғилганларни номзоднинг таржимаи ҳоли билан таништирди.
Ўзбекистон Республикаси Президентлигига номзод Акмал Саидов ўз сайловолди дастури юзасидан нутқ сўзлади.
Номзоднинг сайловолди дастурида давлат ва фуқаролик жамияти ўртасида ижтимоий шерикликни ривожлантириш бўйича ташкилий-ҳуқуқий ва иқтисодий чоралар кўриш, маҳаллий вакиллик органлари ҳузурида жамоатчилик комиссиялари тузиш, оммавий ахборот воситалари ва бошқа фуқаролик жамияти институтларини изчил ва демократик рағбатлантириш тизимини жорий этиш, суд-ҳуқуқ соҳасини янада демократлаштириш, аҳолининг ҳуқуқий онги ва маданиятини янада юксалтириш устувор вазифалардан бири сифатида белгиланган.
Учрашувда Тўрткўл тумани бандликка кўмаклашиш ва аҳолини ижтимоий муҳофаза қилиш маркази директори Б. Машарипов ва бошқалар номзоднинг дастури хусусида ўз фикр-мулоҳазаларини билдирди. Сайловчиларни жорий йилнинг 29 март куни бўлиб ўтадиган Ўзбекистон Республикаси Президенти сайловида фаол иштирок этишга чақирди.
Хоразм вилоятидаги учрашувни Ўзбекистон Республикаси Президенти сайловини ўтказувчи 12-Хоразм округ сайлов комиссияси раиси А. Раҳимов очди. Президентликка номзоднинг ишончли вакили Б. Бобожонов йиғилганларни номзоднинг таржимаи ҳоли билан таништирди.
Тадбирда Президентликка номзод Акмал Саидов нутқ сўзлаб, ўз сайловолди дастурида белгиланган асосий йўналишлар ҳақида сайловчиларга маълумот берди.
Дастурда миллати, дини, ижтимоий ҳолати ва келиб чиқишидан қатъи назар, Ўзбекистон халқи барча фуқароларининг бирдамлиги ва ҳамжиҳатлигини янада мустаҳкамлаш, «маҳалла» миллий демократик институтини янада такомиллаштириш, унинг ташкилий ва иқтисодий асосларини мустаҳкамлаш, фуқароларнинг маҳаллий аҳамиятга эга бўлган масалаларни ҳал этишда ҳамда миллий ва маънавий қадриятлар, маҳаллий урф-одатлар ва анъаналарни қайта тиклаш ва бойитишдаги бевосита иштирокини таъминлашда маҳалла ролини кучайтириш, миллий ҳунармандлик, оилавий тадбиркорлик ҳамда туризмни янада ривожлантириш орқали аҳоли бандлигини таъминлаш каби масалаларга алоҳида эътибор қаратилган.
Учрашувда халқ депутатлари Хоразм вилояти Кенгашидаги Ўзбекистон «Миллий тикланиш» демократик партияси депутатлик гуруҳи раҳбари I. Болтаев ва бошқалар номзоднинг дастури ҳақида ўз фикр-мулоҳазаларини билдириб, ушбу дастурда қайд этилган устувор йўналишларни амалга ошириш мамлакатни ижтимоий ривожлантириш, демократик ўзгаришларни янада чуқурлаштиришга хизмат қилишини алоҳида таъкидлади.
Изоҳ (0)