O‘zbekiston “Milliy tiklanish” demokratik partiyasidan O‘zbekiston Respublikasi Prezidentligiga nomzod Akmal Saidov 20-fevral kuni Qoraqalpog‘iston Respublikasi hamda Xorazm viloyati saylovchilari bilan uchrashdi, deb xabar bermoqda O‘zbekiston Milliy axborot agentligi.
Nukus shahridagi uchrashuvni O‘zbekiston Respublikasi Prezidenti saylovini o‘tkazuvchi 1-Qoraqalpog‘iston okrug saylov komissiyasining raisi K. Karimov ochdi. Prezidentlikka nomzodning ishonchli vakili Y. Qutiboyeva yig‘ilganlarni nomzodning tarjimai holi bilan tanishtirdi.
O‘zbekiston Respublikasi Prezidentligiga nomzod Akmal Saidov o‘z saylovoldi dasturi yuzasidan nutq so‘zladi.
Nomzodning saylovoldi dasturida davlat va fuqarolik jamiyati o‘rtasida ijtimoiy sheriklikni rivojlantirish bo‘yicha tashkiliy-huquqiy va iqtisodiy choralar ko‘rish, mahalliy vakillik organlari huzurida jamoatchilik komissiyalari tuzish, ommaviy axborot vositalari va boshqa fuqarolik jamiyati institutlarini izchil va demokratik rag‘batlantirish tizimini joriy etish, sud-huquq sohasini yanada demokratlashtirish, aholining huquqiy ongi va madaniyatini yanada yuksaltirish ustuvor vazifalardan biri sifatida belgilangan.
Uchrashuvda To‘rtko‘l tumani bandlikka ko‘maklashish va aholini ijtimoiy muhofaza qilish markazi direktori B. Masharipov va boshqalar nomzodning dasturi xususida o‘z fikr-mulohazalarini bildirdi. Saylovchilarni joriy yilning 29-mart kuni bo‘lib o‘tadigan O‘zbekiston Respublikasi Prezidenti saylovida faol ishtirok etishga chaqirdi.
Xorazm viloyatidagi uchrashuvni O‘zbekiston Respublikasi Prezidenti saylovini o‘tkazuvchi 12-Xorazm okrug saylov komissiyasi raisi A. Rahimov ochdi. Prezidentlikka nomzodning ishonchli vakili B. Bobojonov yig‘ilganlarni nomzodning tarjimai holi bilan tanishtirdi.
Tadbirda Prezidentlikka nomzod Akmal Saidov nutq so‘zlab, o‘z saylovoldi dasturida belgilangan asosiy yo‘nalishlar haqida saylovchilarga ma’lumot berdi.
Dasturda millati, dini, ijtimoiy holati va kelib chiqishidan qat’i nazar, O‘zbekiston xalqi barcha fuqarolarining birdamligi va hamjihatligini yanada mustahkamlash, “mahalla” milliy demokratik institutini yanada takomillashtirish, uning tashkiliy va iqtisodiy asoslarini mustahkamlash, fuqarolarning mahalliy ahamiyatga ega bo‘lgan masalalarni hal etishda hamda milliy va ma’naviy qadriyatlar, mahalliy urf-odatlar va an’analarni qayta tiklash va boyitishdagi bevosita ishtirokini ta’minlashda mahalla rolini kuchaytirish, milliy hunarmandlik, oilaviy tadbirkorlik hamda turizmni yanada rivojlantirish orqali aholi bandligini ta’minlash kabi masalalarga alohida e’tibor qaratilgan.
Uchrashuvda xalq deputatlari Xorazm viloyati Kengashidagi O‘zbekiston “Milliy tiklanish” demokratik partiyasi deputatlik guruhi rahbari I. Boltayev va boshqalar nomzodning dasturi haqida o‘z fikr-mulohazalarini bildirib, ushbu dasturda qayd etilgan ustuvor yo‘nalishlarni amalga oshirish mamlakatni ijtimoiy rivojlantirish, demokratik o‘zgarishlarni yanada chuqurlashtirishga xizmat qilishini alohida ta’kidladi.
Izoh (0)