Испаниянинг El Pais нашри Европа ва Америкадаги баъзи давлатларнинг раҳбарлари оладиган маошлар ҳақидаги маълумотларни чоп этди, деб хабар бермоқда «Корреспондент.net».
Қайд этилишича, Буюк Британия қироллик саройининг бюджети 38,78 миллион еврони ташкил этади, бу қиролича Елизавета II’нинг жамоат мулкидан оладиган даромадининг 15 фоизи демакдир.
Голландия қироллик саройининг бюджети эса 38 миллион еврони ташкил этади. Бундан 825 минг еврони қирол Виллем-Александр маош сифатида олади, 4,2 миллион евро унинг шахсий ишлари ва котибият харажатлари учун сарфланади.
Бельгия қироллик саройининг бюджети қирол Филиппга тўланадиган 11,5 миллион евродан иборат, бироқ унинг ўзи айнан маош сифатида қанча олиши маълум эмас. Бундан ташқари, 2013 йилдан тахтдан воз кечган қиролнинг отаси 931 минг евро йиллик тўловни олишда давом этмоқда.
Дания қироллик саройи бюджети 13,2 миллион еврони ташкил этади. Қиролича Маргрете II йилига 1,34 миллион евро маош олса, фарзандларига 509,5 минг евродан берилади.
Норвегия қироли Харалд V ва унинг рафиқаси йилига 24 миллион евро миқдорида маош олади, улар шу маблағ ҳисобига ўзларининг барча харажатларини қоплашлари лозим.
Испания қироллик саройи бюджети 7,7 миллион еврони ташкил этади. Бундан 234 204 еврони қирол Филипп IV 2015 йилда маош сифатида олиши керак. Унинг тахтдан воз кечган отаси 187 356 евро, рафиқаси Летисия эса 128 808 евро миқдорида йиллик маош олади.
Йилига 400 минг доллар (321 121 евро) маош оладиган АҚШ президенти Барак Обаманинг овқатланиш харажатларини давлат кўтаради.
Франция президенти Франсуа Олланднинг маоши барча солиқлардан кейин 178 минг еврони ташкил қилади. Бош вазир Мануэль Валлснинг маоши ҳам президентники билан бир хил.
Германия президенти Йоахим Гаук 2014 йилда 214 минг еворлик маошдан ташқари ўз котибиятини бошқариш учун 78 минг евро олган. Канцлер Ангела Меркелнинг маоши эса барча солиқлардан кейин 270 396 еврони ташкил қилган.
Италия президенти Сержо Маттарелла оладиган йиллик маош барча солиқлардан кейин 239 минг евро қолади.
Изоҳ (0)