Тошкент Давлат юридик университети яқинда Ўзбекистон Республикаси Олий ва ўрта махсус, касб-ҳунар таълим вазирининг буйруғига кўра, талабалар билимини баҳолашнинг янги такомиллашган тизимидан фойдаланиш имкониятига эга бўлган Ўзбекистондаги илк олий таълим муассасасига айланади. Бу ҳақда «Ut.uz»га таяниб, «Kun.uz» хабар берди.
Ўзбекистонда талабалар билимини рейтинг тизими бўйича баҳолашнинг ягона тартиб-қоидалари ўрнатилган. Эндиликда Тошкент Давлат юридик университети бу қоидалардан мустасно ҳолда ўз билимларини баҳолаш тизимини жорий этади. Тартиб-қоидаларда бу ҳақдаги тегишли эслатма 2013 йилда ушбу олий таълим муассасасида таълим жараёнини такомиллаштириш ва унга модулли таълим бериш тизими киритилишининг бошланиши билан боғлиқ ҳолда пайдо бўлган эди.
Эндиликда юридик университети талабалари бошқа олий таълим муассасалари талабаларидан фарқли равишда, янги тизимда кўзда тутилган билимларни назорат қилишнинг барча уч туридан – кундалик, оралиқ ва якуний назоратдан ўтиши лозим.
Бошқа ОТМларда талабалар агар кундалик ва оралиқ назоратдан етарлича ўтиш балига эга бўлса, якуний назоратга келмаслиги мумкин ёки аксинча, кундалик ва оралиқ назоратлар бўйича етарлича ўтиш бали йиға олмаган талабалар, якуний назоратга қўйилмайди.
Яқин орада юридик университетда билимларни баҳолашнинг ўз тартиби жорий этилади. Унда талабалар билимини объектив баҳолашга туртки берувчи қўшимча меъёрлар ҳисобга олинган. Хусусан, унда ёзма ишларни топшириш ва баҳолаш қоидаларига катта эътибор қаратилган. Улар баҳоловчи-ўқитувчига шифрланган тарзда, талабанинг исм-фамилияси кўрсатилмаган ҳолда топширилади.
Бошқа институт, университет ва академиялар учун уларда модулли таълим бериш тизими киритилишига рухсат берувчи ҳукумат томонидан тегишли меъёрий-ҳуқуқий ҳужжатлар қабул қилинса, бу ОТМлар ҳам юқоридаги ҳуқуқдан фойдаланиш имкониятига эга бўлади.
Изоҳ (0)