13 январь куни Тошкент шаҳар ҳокимияти биносида «Тошшаҳартрансхизмат» АКнинг йил якунларига бағишланган матбуот анжумани бўлиб ўтди, дея хабар бермоқда UzReport. Компания томонидан ўтган йил давомида йўналишларда ҳаракат таркибини янгилаш учун 80 та Isuzu автобуслари харид қилиниб йўналишларга чиқарилган.
Анжуманда маълум бўлишича, «Тошшаҳартрансхизмат» АК Тошкент шаҳрида йўловчи ташиш транспортини ташкил этиш тизимини янада такомиллаштириш мақсадида 2013 йил октябрдан буён фаолият юритиб келмоқда.
Компания таркибида 9 та автобус саройлари, 8 та масъулияти чекланган жамиятлар, «Тошкент трамвайи» УК, «Тошкент метрополитени» ДУК, «Тоштрансдиспетчерхизмат» УК, «Тошйўловчитрансхизмат» УК, «Тошавтотаъмирхизмат» УКлар фаолият кўрсатмоқда.
2014 йилда 309 миллиондан ортиқ йўловчилар ташилди ва 224 миллиард сўм миқдорида даромад олинди. Бугунги кунда жами 127 та йўналишларнинг 1370 та автобусларига GPS трекерлари ва GSM антенналари ўрнатилди. Йўналишларда ҳаракатланаётган 157 дона автобусларга 2 томонлама сўзлашув мосламалари ўрнатилди.
Анжуманда, «Тошшаҳартрансхизмат» АК бошқарма бошлиғи О.Х. Содиқов – 2015 йилда йўловчиларни ташиш бўйича тариф, яъни йўлкира нархлари кўтарилмаслигини таъкидлади.
Шунингдек, анжуманда ОАВ ходимлари ўзларини қизиқтирган барча саволларига мутассадилар томонидан тўлиқ жавоб олишди.
Изоҳ (0)