Toshkent Davlat yuridik universitetida talabalar bilimini baholashning yangi tizimi paydo bo‘ladi
Toshkent Davlat yuridik universiteti yaqinda O‘zbekiston Respublikasi Oliy va o‘rta maxsus, kasb-hunar ta’lim vazirining buyrug‘iga ko‘ra, talabalar bilimini baholashning yangi takomillashgan tizimidan foydalanish imkoniyatiga ega bo‘lgan O‘zbekistondagi ilk oliy ta’lim muassasasiga aylanadi. Bu haqda “Ut.uz”ga tayanib, “Kun.uz” xabar berdi.
O‘zbekistonda talabalar bilimini reyting tizimi bo‘yicha baholashning yagona tartib-qoidalari o‘rnatilgan. Endilikda Toshkent Davlat yuridik universiteti bu qoidalardan mustasno holda o‘z bilimlarini baholash tizimini joriy etadi. Tartib-qoidalarda bu haqdagi tegishli eslatma 2013-yilda ushbu oliy ta’lim muassasasida ta’lim jarayonini takomillashtirish va unga modulli ta’lim berish tizimi kiritilishining boshlanishi bilan bog‘liq holda paydo bo‘lgan edi.
Endilikda yuridik universiteti talabalari boshqa oliy ta’lim muassasalari talabalaridan farqli ravishda, yangi tizimda ko‘zda tutilgan bilimlarni nazorat qilishning barcha uch turidan – kundalik, oraliq va yakuniy nazoratdan o‘tishi lozim.
Boshqa OTMlarda talabalar agar kundalik va oraliq nazoratdan yetarlicha o‘tish baliga ega bo‘lsa, yakuniy nazoratga kelmasligi mumkin yoki aksincha, kundalik va oraliq nazoratlar bo‘yicha yetarlicha o‘tish bali yig‘a olmagan talabalar, yakuniy nazoratga qo‘yilmaydi.
Yaqin orada yuridik universitetda bilimlarni baholashning o‘z tartibi joriy etiladi. Unda talabalar bilimini obyektiv baholashga turtki beruvchi qo‘shimcha me’yorlar hisobga olingan. Xususan, unda yozma ishlarni topshirish va baholash qoidalariga katta e’tibor qaratilgan. Ular baholovchi-o‘qituvchiga shifrlangan tarzda, talabaning ism-familiyasi ko‘rsatilmagan holda topshiriladi.
Boshqa institut, universitet va akademiyalar uchun ularda modulli ta’lim berish tizimi kiritilishiga ruxsat beruvchi hukumat tomonidan tegishli me’yoriy-huquqiy hujjatlar qabul qilinsa, bu OTMlar ham yuqoridagi huquqdan foydalanish imkoniyatiga ega bo‘ladi.
