Ўзбекистон бош вазири биринчи ўринбосари, молия вазири Рустам Азимов Қозоғистон пойтахти Остона шаҳрида ташкил этилган Шанхай ҳамкорлиги ташкилотига аъзо мамлакатларнинг ҳукумат раҳбарлари мажлиси доирасида Қозоғистон президенти Нурсултон Назарбоев билан учрашувда иштирок этди. Бу ҳақда «Kun.uz» хабар бермоқда.
Қозоғистон президенти матбуот хизматининг қайд этишича, учрашувда, Азимовдан ташқари, Хитой бош вазири Ли Кэцян, Қирғизистон бош вазири Жўмарт Ўторбаев, Россия бош вазири Дмитрий Медведев, Тожикистон бош вазири Қоҳир Расулзода, ШҲТ бош котиби Дмитрий Мезенсев ва ШҲТ Минтақавий аксилтеррор тузилмаси Ижроия қўмитаси директори Синьфэн Чжан иштирок этган.
Нурсултон Назарбоевнинг қайд этишича, ШҲТнинг Уфада бўлиб ўтадиган давлат раҳбарлари кенгаши мажлисида ташкилотнинг 2025 йилгача бўлган ривожланиш стратегиясини тасдиқлаш режалаштирилмоқда, шу сабабли ҳар бир ҳукумат олдида катта ҳажмдаги ишлар турибди.
Назарбоевнинг сўзларига кўра, ШҲТ ўзига хос Умумосиё фаровонлик жамғармаси вазифасини бажармоқда, шу сабабли ҳам ҳар бир иштирокчи мамлакат унда тегишли кўринишда қатнашиши керак.
«Ташкилот, энг аввало, барқарорлик, ўртамизда ўзаро ҳудудий баҳслар бўлмаслиги йўлида, шунингдек, замонавий дунёнинг таҳдидларига қарши биргаликда курашиш мақсадида иш олиб бормоқда. Биз, шунингдек, озиқ-овқат, экология ва энергетика хавфсизлиги масалаларини ҳам ҳал қилишимиз керак», – деди Қозоғистон президенти.
Нурсултон Назарбоевнинг таъкидлашича, Қозоғистон ШҲТ Тараққиёт банки ташкил этилишини қўллаб қувватлайди. Бундан ташқари, транспорт соҳасидаги ҳамкорлик ШҲТ доирасидаги муносабатларнинг энг асосий йўналишларидан бири бўлиб қолади.
Изоҳ (0)