O‘zbekiston bosh vaziri birinchi o‘rinbosari, moliya vaziri Rustam Azimov Qozog‘iston poytaxti Ostona shahrida tashkil etilgan Shanxay hamkorligi tashkilotiga a’zo mamlakatlarning hukumat rahbarlari majlisi doirasida Qozog‘iston prezidenti Nursulton Nazarboyev bilan uchrashuvda ishtirok etdi. Bu haqda “Kun.uz” xabar bermoqda.
Qozog‘iston prezidenti matbuot xizmatining qayd etishicha, uchrashuvda, Azimovdan tashqari, Xitoy bosh vaziri Li Ketsyan, Qirg‘iziston bosh vaziri Jo‘mart O‘torbayev, Rossiya bosh vaziri Dmitriy Medvedev, Tojikiston bosh vaziri Qohir Rasulzoda, ShHT bosh kotibi Dmitriy Mezensev va ShHT Mintaqaviy aksilterror tuzilmasi Ijroiya qo‘mitasi direktori Sinfen Chjan ishtirok etgan.
Nursulton Nazarboyevning qayd etishicha, ShHTning Ufada bo‘lib o‘tadigan davlat rahbarlari kengashi majlisida tashkilotning 2025-yilgacha bo‘lgan rivojlanish strategiyasini tasdiqlash rejalashtirilmoqda, shu sababli har bir hukumat oldida katta hajmdagi ishlar turibdi.
Nazarboyevning so‘zlariga ko‘ra, ShHT o‘ziga xos Umumosiyo farovonlik jamg‘armasi vazifasini bajarmoqda, shu sababli ham har bir ishtirokchi mamlakat unda tegishli ko‘rinishda qatnashishi kerak.
“Tashkilot, eng avvalo, barqarorlik, o‘rtamizda o‘zaro hududiy bahslar bo‘lmasligi yo‘lida, shuningdek, zamonaviy dunyoning tahdidlariga qarshi birgalikda kurashish maqsadida ish olib bormoqda. Biz, shuningdek, oziq-ovqat, ekologiya va energetika xavfsizligi masalalarini ham hal qilishimiz kerak”, – dedi Qozog‘iston prezidenti.
Nursulton Nazarboyevning ta’kidlashicha, Qozog‘iston ShHT Taraqqiyot banki tashkil etilishini qo‘llab quvvatlaydi. Bundan tashqari, transport sohasidagi hamkorlik ShHT doirasidagi munosabatlarning eng asosiy yo‘nalishlaridan biri bo‘lib qoladi.
Izoh (0)