1 декабрдан тижорий фаолиятини бошлаши кутилаётган UMS мобил оператори бугун 30 ноябрдан ўз расмий сайтини ишга туширди.
UMS.uz манзилида жойлашган сайтда 24 ноябрдан оператор фаолияти бошланишига неча кун қолгани кўрсатиб турилган эди. Бугундан ишга тушган сайт ҳозирда фақат рус тилидаги версиясига эга ва уч йирик бўлимдан иборат: «Хусусий мижозларга», «Корпоратив мижозларга», ҳамда «Компания ҳақида».
Компания расмий сайтида берилган хусусий ва корпоратив тарифлар, шунингдек интернет-пакетлар ҳақидаги маълумот UMS овозли хизмати орқали олинган маълумот билан мос келади. Қўшимча сифатида барча тарифларда халқаро чиқиш SMSлари 15 цент, халқаро чиқиш MMSлари эса 30 центдан бўлиши кўрсатилган.
«Компания ҳақида» бўлимига кирилганда сайтнинг бош саҳифасига қайта йўналтирилади.
Шунингдек, чиройли рақамлар учун алоҳида тарифлар ҳам жорий этилган. 10 минг доллар турадиган «Платина» рақамлар соҳиблари кунига 20 цент абонент тўлови ҳам тўлайди. «Супер олтин» рақамлар нархи 5 минг доллар, кунлик абонент тўлови 20 цент, «Олтин» рақамлар нархи 1000 доллар ва кунлик абонент тўлови 15 цент, «Кумуш» рақамлар нархи 500 доллар ва кунлик абонент тўлови 10 цент ҳамда «Бронза» рақамлар нархи 100 доллар ва кунлик абонент тўлови 5 цент эканлиги кўрсатилган.
«Супер платина», «Платина» ва «Супер олтин» рақамлар учун тўловлар «Валюта назорати» тўғрисидаги қонуннинг 18-моддасига биноан халқаро тўлов карталари орқали АҚШ долларида, «Олтин», «Кумуш« ва «Бронза» рақамлар учун тўлов Марказий банкнинг тўлов кунидаги курси бўйича сўмда амалга оширилиши маълум қилинган.
Изоҳ (0)