Ucell мобил алоқа оператори 2014 йил 1 декабрдан бошлаб Тошкент шаҳрида жойлашган барча офисларида 4G тармоғига уланиш имкониятини тақдим этади. Бу ҳақда компания расмий сайтида хабар берилди.
Хабарда айтилишича, 2014 йилнинг 28, 29 ва 30 ноябрь кунлари Next савдо-кўнгилочар марказида жойлашган Ucell компаниясининг стенди олдида 4G нинг ажойиб тезлигини синаб кўриш имконияти мавжуд бўлади.
4G технологиясидан фойдаланилганда мобил интернет тезилиги 150 Мб/сонияни ташкил этиши қайд этилган. 4G технологияси Ucell’нинг 4G Модеми (Huawei E3272), Ucellнинг 4G Wi-Fi Роутери (Huawei E5172), 4G Band 7 (2600 Мгс частотасида) диапазонида амал қилувчи мобил қурилма (смартфон, планшет ва бошқалар)да амал қилиши айтилган. Бугунги кунда Ўзбекистонда 4G технологиясини қўллаб-қувватловчи мобил қурилмалар iPhone 6, iPhone 6 Plus, Huawei, HTC, ZTE кабилар эканлиги маълум қилинган.
4G’га уланиш учун Ucell офисларидан бирига паспорт ва мобил қурилма – телефон, модем, роутер ёки планшет билан мурожаат қилиш лозимлиги айтилган. Келтирилган манзилда 4G тармоғи ишлаши ва қурилма тўртинчи авлод технологиясини қўллаб-қувватлашига ишонч ҳосил қилингач, амалдаги тариф ва рақамни сақлаб қолган ҳолда, мавжуд рақамга (агар USIM-карта 4G ни қўллаб-қувватласа) бепул 4G хизмати улаб берилади. 4G тармоғидан фойдаланиш вақтида овозли қўнғироқлар ва USSD сўровларни ишлатиб бўлмаслиги маълум қилинган.
«Бугунги кунда 4G Интернет фақат Тошкент шаҳрида амал қилади. Ucell янги ҳудудларни ўзлаштириш жараёнида бўлиб, тез орада ушбу тармоқ Ўзбекистоннинг бошқа шаҳарларида ҳам амал қила бошлайди», − дейилади Ucell расмий сайтининг 4G тармоғи ҳақида батафсил маълумот берилган саҳифасида.
Эслатиб ўтамиз, 2014 йил 1 декабрдан Ўзбекистонда UMS мобил алоқа оператори иш бошлаши кутилмоқда. Шунингдек, 27 ноябрь куни Beeline сентябрь ойида бошланган 3G-мосламалари харидорларига ярим йил мобайнида бонусли интернет бериш акциясини 2014 йилнинг сўнгига қадар давом этишини эълон қилди.
Изоҳ (0)