2013 йилда собиқ Иттифоқ ҳудудидаги давлатларда ОИВ билан касалланишга алоқадор 105 мингта янги ҳолатлар қайд этилган. Бу ҳақда Касалликлар назорати ва профилактикаси бўйича Европа маркази ҳамда Жаҳон соғлиқни сақлаш ташкилоти маърузасида айтилади, деб ёзади Interfax.
Шу тариқа ОИВ юқтирганлар сони 2004 йилдан буён деярли икки марта ўсди, ўша йили 50 мингга яқин бундай ҳолат аниқланган эди.
Жаҳон соғлиқни сақлаш ташкилоти маълумотларига кўра, ОИВ билан касалланганлар сонининг ошишига ҳимояланмаган жинсий алоқа ва наркотик моддаларни қон томири орқали қабул қилиш сабаб бўлмоқда.
Маърузада келтирилишича, ОИВ юқтирганларнинг катта қисми Россия ва Украина ҳиссасига тўғри келади. Касалланганларнинг кўпчилиги 30—39 ёшлиларни ташкил этади.
Бутун дунёда ОИВ билан зарарланганлар сони 2013 йил сўнгида 35 миллион кишига тенг бўлган.
Изоҳ (0)