Xiaomi раҳбарининг фикрича, компания 5-10 йил ичида Samsung ва Apple’дан ўзиб кетади

Бундан тўрт ярим йил аввал ҳеч ким номини ҳам эшитмаган Xiaomi компанияси бугунги кунда энг кўп смартфон сотадиган дунёнинг учинчи компанияси ҳисобланади. Бу билан у анча йиллик тарихга эга Sony, LG, Lenovo ва HTC каби компаниялардан ўзиб кетди.

Xiaomi компанияси раҳбари Леи Жуннинг фикрича, компания кейинги 5-10 йил ичида бугунги кунда етакчиликни эгаллаб турган Samsung ва Apple’дан ўзиб кетади. Бу ҳақда Phonearena.com маълумотига асосланиб «Пароль» нашри хабар берди.

Ушбу компания ҳозиргача 60 миллион дона смартфон сотган бўлса, 2015 йилнинг якунигача эса бу кўрсаткич 200 миллионга етиши кутилмоқда. Бу эса Xiaomi кейинги йилда 100 миллиондан ортиқ смартфон сотиши мумкинлигини билдиради.

Эслатиб ўтамиз, Xiaomi компанияси июль ойида энг кўп смартфон сотиш бўйича дунёдаги бешинчи компания эди, ҳозирда эса учинчи ўринга кўтарилиб олган. Бундан ҳам Леи Жуннинг сўзларида жон борлигини тахмин қилиш мумкин.

Шунингдек, «Пароль» нашрида қуйидаги мақолаларни ўқишингиз мумкин:

• LG Uzbekistan селфи суратлар танловини бошлади;
• Apple App Store’даги Free тугмаси номини Get’га алмаштирди.