Бразилиялик ўсмир SMS-хабар ёзиш тезлиги бўйича жаҳон рекордини янгилади

Сенсорли экранга эга смартфонда матн териш тезлиги бўйича жаҳон рекорди iPhone 6 Plus ёрдамида ўрнатилди, деб ёзади «Российская газета». Бразилиялик Марсель Фернандес Фильо исмли йигитча дунёда энг тезкор деб расман тан олинган Fleksy клавиатурасидан фойдаланиб, ўз рекордини янгилади. У шу йилнинг майида ҳам Гиннеснинг Рекордлар китобига киритилган эди.

Етти ой аввал Марсель худди шундай клавиатурадан фойдаланган, бироқ у Samsung Galaxy S4 смартфонига ўрнатилган эди. Ўша вақтда Fleksy клавиатурасини iOS-қурилмаларда қўллаш мумкин бўлмаган.

Май ойида ўсмир инглиз тилидаги «Serrasalmus ва Pygocentrus туридаги ўткир тишли пираньялар дунёда чучук сувда яшовчи энг тажовузкор балиқлардир. Бироқ ҳақиқатда улар одамларга камдан-кам ташланади» («The razor-toothed piranhas of the genera Serrasalmus and Pygocentrus are the most ferocious freshwater fish in the world. In reality they seldom attack a human») жумласини 18,19 сонияда терган бўлса, бу сафар у шу вақтни 17 сониягача қисқартиришга муваффақ бўлди.