Xiaomi rahbarining fikricha, kompaniya 5-10 yil ichida Samsung va Apple’dan o‘zib ketadi

Bundan to‘rt yarim yil avval hech kim nomini ham eshitmagan Xiaomi kompaniyasi bugungi kunda eng ko‘p smartfon sotadigan dunyoning uchinchi kompaniyasi hisoblanadi. Bu bilan u ancha yillik tarixga ega Sony, LG, Lenovo va HTC kabi kompaniyalardan o‘zib ketdi.

Xiaomi kompaniyasi rahbari Lei Junning fikricha, kompaniya keyingi 5-10 yil ichida bugungi kunda yetakchilikni egallab turgan Samsung va Apple’dan o‘zib ketadi. Bu haqda Phonearena.com ma’lumotiga asoslanib “Parol” nashri xabar berdi.

Ushbu kompaniya hozirgacha 60 million dona smartfon sotgan bo‘lsa, 2015-yilning yakunigacha esa bu ko‘rsatkich 200 millionga yetishi kutilmoqda. Bu esa Xiaomi keyingi yilda 100 milliondan ortiq smartfon sotishi mumkinligini bildiradi.

Eslatib o‘tamiz, Xiaomi kompaniyasi iyul oyida eng ko‘p smartfon sotish bo‘yicha dunyodagi beshinchi kompaniya edi, hozirda esa uchinchi o‘ringa ko‘tarilib olgan. Bundan ham Lei Junning so‘zlarida jon borligini taxmin qilish mumkin.

Shuningdek, “Parol” nashrida quyidagi maqolalarni o‘qishingiz mumkin:

• LG Uzbekistan selfi suratlar tanlovini boshladi;
• Apple App Store’dagi Free tugmasi nomini Get’ga almashtirdi.