Деҳли шаҳрида Ҳиндистон фуқаролик кинофоруми, Ҳиндистон киноклублари федерацияси, Ҳиндистон фотографлари ва рассомлари жамияти томонидан ташкил этиладиган анъанавий «Дўстлик» кинофестивалининг бешинчи анжумани ўз ишини бошлади. Бу ҳақда «Жаҳон» ахборот агентлиги хабар бермоқда.
Деҳлида аккредитациядан ўтган МДҲ мамлакатларининг элчихоналари кўмагида ташкил этилган ушбу тадбирнинг очилиш маросимида Ҳиндистоннинг ижтимоий-сиёсий, маданий-гуманитар доиралари вакиллари, дипломатия ваколатхоналари раҳбарлари, киномухлислар ва журналистлар ҳозир бўлди.
Анжуманда бундай санъат форумлари жаҳон халқлари ўртасидаги дўстлик ришталарини янада мустаҳкамлаш ҳамда ўзаро ишончни оширишга хизмат қилиши таъкидланди.
Фестивальда «Ўзбекфильм» киностудияси томонидан суратга олинган, бир неча халқаро мукофотларга сазовор бўлган «Кечиккан ҳаёт» фильми (сценарий муаллифи Й. Тўйчиев, режиссёр А. Шаҳобиддинов) намойиш этилди.
Турмушнинг инсон олдига қўядиган вазифалари, орзу ва ниятларнинг ушалиши йўлидаги меҳнат, ҳаётда тўғри йўлни танлашнинг муҳимлиги ўзига хос, янгича ва қизиқарли тарзда, ажойиб образлар воситасида ифода этилган мазкур асар ҳиндистонлик кино мухлислари ва мутахассисларда катта қизиқиш уйғотди.
Хусусан, Ҳиндистон фотографлари ва рассомлари жамияти президенти Вимал Меҳтанинг фикрича, «Кечиккан ҳаёт» фильми Ўзбекистонда ижод қилаётган ёш режиссёр ва актёрлар, уларнинг маҳоратлари, ўзбек кино мактабининг бугунги даражаси ва эришаётган ютуқлари ҳақида атрофлича тасаввур беради.
Бешинчи «Дўстлик» кинофестивали шу йилнинг 22 ноябрига қадар давом этади.
Изоҳ (0)