«Тошкент-Ўш» автомобиль йўлининг Қамчиқ довони қисмида 2014—2015 йиллар қиш мавсумига қизғин тайёргарлик кўрилмоқда. Бу ҳақда Фавқулодда вазиятлар вазирлиги матбуот хизмати хабар берди.
Қамчиқ довони орқали ўтадиган «Гулистон - Бўка - Ангрен - Қўқон - Андижон - Ўш» автомобиль йўли республикамизни хориж мамлакатлари билан боғлабгина қолмай, балки муҳим сиёсий-иқтисодий аҳамиятга эга ҳамдир.
«Тошкент – Ўш» йўлининг Қамчиқ довони қисми у қадар баланд бўлмаса-да, Марказий Осиё давлатлари ичида энг узунларидан бири саналади. Бу йўлдан Фарғона водийсининг учта вилоятидан ташқари, хориждан келган йўловчи-сайёҳларнинг ҳам қадами узилмайди. Қолаверса, қўшни Тожикистон ва Қирғизистон Республикалари аҳолиси, балки хитойлик меҳмонлар учун ҳам энг қисқа ва қулай бўлган тоғ йўли ҳисобланади. Довон йўлининг қиш-у ёзин серқатновлиги ҳам шундан.
Ўзбекистон Республикаси Ҳукуматининг топшириғига асосан, Фавқулодда вазиятлар, Ички ишлар вазирликлари, «Ўзавтойўл» компанияси ва Республика йўл жамғармаси билан биргаликда 2014—2015 йиллар қишки мавсумда А-373 «Тошкент-Ўш» автомобиль йўлининг Қамчиқ довонининг барқарор фаолият кўрсатишини, довон орқали автотранспорт воситалари ва йўловчиларнинг хавфсиз ҳамда узлуксиз ҳаракатларини таъминлаш мақсадида, бир қатор самарали ишлар амалга оширилмоқда.
Қишки мавсумга жалб қилинишга режалаштирилган барча техника ва механизмлар шай ҳолатга келтирилмоқда ва йўл бўлимларига бириктирилди.
Режада белгиланган автойўл ёқасидаги автомобиллар тўхтаб туришига мўлжалланган 13 та фалокатли ҳолатларда чиқиш йўллари ва 7 та вақтинча тўхташ майдончалари тозаланиб, уларнинг ҳолати доимий назоратга олинган.
Шунингдек, «Қамчиқавтойўл» ИЙФКнинг берган маълумотига кўра автомобиль йўлида кечаю кундуз хизмат қилаётган ишчилар учун200 комплект иссиқ кийим, 400 жуфт оёқ кийим ва 450 жуфт қўлқоп захираси яратилган.
Шу билан бир қаторда, «ВИСАТА GROUP» масъулияти чекланган жамият томонидан қор уюмлари тўпланадиган жойларда ўрнатилиши режалаштирилган 1710 та қор кўчкисидан ҳимоя қилиш тўсиқларидан 1000 дан ортиғи ўрнатилди.
Қамчиқ довонида оғир климатик шароитларда қолиб кетган аҳолига ёрдам кўрсатиш ва хавфсиз жойларга кўчириш, қор кўчкиси билан боғлиқ фавқулодда вазиятлар содир бўлганда йўловчиларни қабул қилиш мақсадида, Оҳангарон туманида 5 та, Ангрен шаҳрида 5 та ва Поп тумани ҳудудида 4 та ошхоналарнинг фаолияти ва қиш мавсумига тайёргарлик ишлари ўрганиб чиқилди.
Тошкент ва Наманган вилояти ҳокимликлари томонидан Қамчиқ довонида фаолият олиб бораётган 15 та назорат гуруҳларининг шахсий таркиби учун шароитлар яратиш мақсадида, белгиланган меъёрларга асосан озиқ-овқат маҳсулотлари ҳамда электр плита, идиш-товоқ, ётоқ учун зарур бўлган жиҳозлар билан таъминлаш режалаштирилди.
Мазкур тадбирларни амалга ошириш мақсадида, жорий йилнинг 8—10 октябрь кунлари мутасадди вазирлик ва идоралар мутахассисларидан иборат ишчи гуруҳ ўрганиш ишларини олиб борди.
Ишчи гуруҳ томонидан юқорида кўрсатиб ўтилган тадбирлар амалга оширилиши учун таклифлар ва меъёрий ҳужжатлар лойиҳаси ишлаб чиқилиб, вазирлик раҳбариятига тақдим этилди.
Изоҳ (0)