Ўзбекистон Фавқулодда вазиятлар вазирлиги Марказий базасида Фуқаро мудофааси халқаро ташкилоти томонидан юборилган беғараз техник кўмак контейнири қабул қилиб олинди. Бу ҳақда вазирлик матбуот хизмати хабар бермоқда.
Вазирликнинг эслатишича, Фуқаро мудофааси халқаро ташкилоти раҳбари В.Кувшинов 6—11 октябрь кунлари ҳамкорликнинг жорий ҳолати ва истиқболларини муҳокама қилиш юзасидан Ўзбекистонга ташриф буюрган эди.
Контейнерда қутқарув ишлари учун махсус асбоб-анжомлар, хўжалик ишларида қўлланилувчи жиҳозлар, хусусан, қутқарув арқони, ТILLEY прожектори, қутқарувчилар учун сумка анжомлари, биринчи ёрдам кўрсатиш воситалари, (Винник) ўт ўчиргич, қутқарувчилар учун зарурий кийим-бош, арра ва яна шу каби кўплаб махсус техник анжомлар мавжуд.
Тадбирда Фавқулодда вазиятлар вазири Т.Худайберганов, Вазирнинг биринчи ўринбосари К.Орипов ҳамда Вазирлик марказий аппарати бўлим бошлиқлари иштирок этиб, мазкур жиҳозлардан самарали фойдаланиш юзасидан чора-тадбирлар белгиланди.
Қабул қилинган беғараз техник кўмак Фавқулодда вазиятлар вазирлиги тизимининг турли соҳаларида фойдаланиш учун топширилиши режалаштирилмоқда.
Изоҳ (0)