2014 йилнинг 18—24 октябрь кунлари Жанубий Кореянинг Инчеон шаҳрида жисмоний имконияти чекланган спортчилар ўртасида ПараОсиё ўйинлари ўтказилади. Мазкур мусобақаларда Ўзбекистон шарафини 27 нафар спортчи спортнинг дзюдо, енгил атлетика, сузиш ва ўқ отиш турларида ҳимоя қилади. Бу ҳақда Ўзбекистон Миллий Олимпия қўмитаси ахборот хизмати хабар бермоқда.
8 октябрь куни Ўзбекистон Миллий олимпия қўмитасида Инчеон шаҳрига йўл оладиган делегация аъзоларини кузатиш маросими ўтказилди.
Тадбирни Ўзбекистон Маданият ва спорт ишлари вазирининг биринчи ўринбосари Мурод Алиев кириш сўзи билан очар экан, Ўзбекистонда Паралимпия ҳаракатини ривожлантириш борасида амалга оширилаётган саъй-ҳаракатлар, ўзбекистонлик паралимпиячилар томонидан сўнгги йилларда эришилган ютуқлар ҳақида тўхталиб ўтди ва Жанубий Кореяга йўл оладиган делегация аъзоларига оқ йўл тилади.
Шундан сўнг, Ўзбекистон миллий паралимпия ассоциацияси раисининг ўринбосари Умид Аҳмаджонов, енгил атлетика бўйича терма жамоа мураббийи Сардор Абдуҳалиқов ҳамда делегация байроқдори Мавлонбек Хайдаров сўзга чиқиб, ПараОсиё ўйинларига йўлланма олган спортчилар беш маротаба ташкил этилган ўқув-машғулот йиғинларида иштирок этганликларини ва бўлажак ўйинларга ҳар томонлама пухта ҳозирлик кўриш учун барча шарт-шароитлар яратиб берилганлигини мамнуният билан таъкидлаб ўтди.
Шунингдек, улар Ўзбекистонда Паралимпия ҳаракатини ривожлантиришга қаратилаётган эътибор ва кўрсатилаётган ғамхўрликлар учун Президент Ислом Каримовга, Ҳукумат раҳбарияти, Миллий олимпия қўмитаси ҳамда Маданият ва спорт ишлари вазирлигига ўз миннатдорчиликларини изҳор этди.
Ўзбекистон миллий олимпия қўмитаси раҳбари, сенатор Мираброр Усманов ПараОсиё ўйинларига йўл олаётган спортчиларга ўта муросасиз кечиши кутилаётган мусобақаларда омад ва зафарлар тилар экан, соғ-саломат бориб, хушхабарлар билан қайтишларини тилади.
Ўзбекистон делегацияси аъзолари 12 октябрь куни Инчеон шаҳрига йўл олади. 14 октябрь куни маҳаллий вақт билан соат 16:00 да (Тошкент вақти билан соат 12:00 да) атлетлар шаҳарчасида Ўзбекистон байроғини кўтаришга бағишланган тадбир бўлиб ўтади.
ПараОсиё ўйинларининг тантанали очилиш маросими эса 18 октябрь куни ўтказилади. Мазкур ПараОсиё ўйинларида 2016 йили Рио-де-Жанейро шаҳри (Бразилия)да ўтказиладиган Паралимпия ўйинларининг лицензиялари ўйналади.
ПараОсиё ўйинларида Ўзбекистон шарафини ҳимоя қиладиган спортчилар рўйхати билан Ўзбекистон Миллий Олимпия қўмитаси ахборот хизматида танишишингиз мумкин.
Маълумот учун, 2010 йили Гуанчжоу (Хитой)да бўлиб ўтган ПараОсиё ўйинларида ўзбекистонлик 21 нафар спортчи иштирок этиб, битта олтин, иккита кумуш ва учта бронза медалига сазовор бўлган.
Изоҳ (0)