Россиянинг МТС мобил алоқа оператори Ўзбекистонда мамлакат ҳукумати билан тузилган қўшма корхона доирасида 1 декабрда алоқа тармоғини ишга туширмоқчи, дея хабар бермоқда Reuters.
МТС хабарига кўра, айни пайтгача қўшма корхонага 2G/3G/LTE лицензиялар, зарур частота диапазони, рақам сиғими ва иш учун зарур бўлган бошқа рухсатномалар берилган, шунингдек Ўзбекистон Республикаси қонунчилигига мувофиқ равишда инвестицияларнинг қайтариб берилиши ва яхши сақланиши учун кафолат тақдим этилган.
Эслатиб ўтамиз, яқиндан бошлаб, Ўзбекистоннинг кўпгина ҳудудларида мобил алоқа фойдаланувчилари телефонларида МТС тармоғи кўрина бошлади. Тармоқ қурилмаларда «UZB MTS» номи билан пайдо бўлди. Аммо тармоққа уланганда қурилмада «No service» («Алоқа йўқ») деган ёзув пайдо бўлмоқда ва қўнғироқларни амалга оширишнинг имконияти йўқ. Бу борада компания тармоқни синовдан ўтказаётгани ҳақида тахмин қилиш мумкин.
Аввалроқ, МТС компанияси Ўзбекистон ҳукумати билан муроса битими имзолагани, Ўзбекистонда янги қўшма корхона ташкил этиши, корхонанинг 50,01 фоизи МТСга, 49,99 фоизи эса Ўзбекистон ҳукуматига тегишли бўлиши ҳақида хабар берган эди.
Бундан ташқари, Ўзбекистон Республикаси Алоқа, ахборотлаштириш ва телекоммуникация технологиялари давлат қўмитаси UMS’га илк фаолиятини олиб бориши учун 2,5 миллион абонент рақами ажратгани, улардан 1,5 миллиони Тошкент аҳолиси учун берилган бўлиб, қолган рақамлар Ўзбекистон вилоятлари бўйича тақсимланганлиги 18 сентябрь куни эълон қилинган эди.
Изоҳ (0)