25 август куни Самақанд вилояти Пастдарғом тумани ички ишлар бўлимининг ёнғин қисмига Тошкент кўчасидаги уйда ёнғин бўлаётгани ҳақида телефон орқали хабар берилган. Ёнғин зудлик билан етиб келган ўт ўчирувчилар томонидан бартараф этилгач, уй хоналаридан бирида устига бир нечта кўрпача ёпиб қўйилган эркак киши жасади топилган. Бу ҳақда «На посту» газетасига таяниб, Podrobno.uz хабар бермоқда.
Аниқланишича, ҳалок бўлган шахс уйнинг эгаси — 1945 йилда туғилган Ойбек Н. бўлиб, у Самарқанддаги олий таълим муассасаларидан бирида дарс берган. Оиласи билан Самарқанд шаҳрида яшаган Ойбек Н. дам олиш кунларини ота-онасидан мерос бўлиб қолган Пастдарғом туманидаги уйда ўтказган.
Марҳумнинг алоқаларини ўрганиб чиқиш натижасида воқеа содир бўлган куни ўқитувчининг уйига рафиқасининг 1994 йилда туғилган Дониёр исмли жияни ташриф буюргани маълум бўлди. Шу боис айнан Дониёр мазкур жиноий ишда асосий гумондор шахсга айланиб, қўлга олинди.
Гумондор сўзларига кўра, у кечки овқатни поччаси билан истеъмол қилишга келишиб, уникига ташриф буюрган. Иккови ҳам анчагина спиртли ичимлик ичган ва икки ўртада жанжал юзага келган. Оғзаки тортишувдан сўнг, жиянининг бир неча бор берган зарбаси натижасида ўқитувчи йиқилиб, нафас олишдан тўхтаган. Дониёр одам ўлдириб қўйганини тушуниб, унинг устига кўрпачалар ёпган ва керосин қуйиб, уйни ёқиб юборган.
Шундан сўнг, жиноятчи уйдан югуриб чиқиб, девордан ошиб ўтган. Бу маълумотни тергов-қидирув вақтида қўшни уйдагилар ҳам тасдиқлади.
Қотиллик юзасидан очилган иш судга топширилган.
Изоҳ (0)