Иордания матбуоти: «Ҳозирги Ўзбекистон термаси аввалгисидан фарқ қилади»
4 сентябрь куни Тошкентдаги «Пахтакор» марказий стадионида Ўзбекистон миллий терма жамоаси Иордания термасига қарши ўртоқлик учрашувида майдонга тушади. Ушбу ўйин Осиёнинг бошқа давлатларида ҳам диққат марказида бўлмоқда, деб хабар беради Uff.uz.
Жумладан, Иорданияда мазкур ўйин ҳақида мамлакат пойтахтида чоп этиладиган The Jordan Times, Arab News, The Star каби нашрлар тўхталиб ўтишган.
«Абу Исмоил Аҳмад шогирдларини Тошкентда муҳим ўртоқлик учрашуви кутмоқда. Бу ўйин аввалгисидан анча фарқ қилади. Биринчидан, бу ўртоқлик мақомидаги ўйин. Бу сафар босим бўлмайди. Иккинчидан эса, рақибимиз аввалгидан бироз кучсизланган. Бу билан Ўзбекистонга қарши ўйин керакмас, демоқчи эмасмиз. Аксинча, айни муддао бўлади.
Ўтган йили Иордания Ўзбекистон қаршилигини енга олганди. Бу сафар ҳам шундай бўлишини тахмин қилиш мумкин.
Бу ўйин орқали Хитойга қарши 9 сентябрда кечадиган учрашув таркиби шакллантирилса ҳеч гапмас. Нима бўлганда ҳам Иордания янги босқич олдида турибди.
Жамоа олдида Австралиядаги мусобақада кучли тўртликка кириш вазифаси қўйилган экан, ҳар бир ўртоқлик ўйинидан максимал равишда фойдаланиш керак деган фикрдамиз», — дейилади номлари юқорида тилга олинган нашрларнинг спорт рукни остида берилаётган хабарларда.
Юқоридагилардан хулоса қилсак, Иордания Тошкентда ғалаба қозонишни режалаштирмоқда. Биз ҳам ўз навбатида футболчиларимиздан чиройли ўйин кутиб қоламиз.
